話說之前明明好地地, 比賽前夕出完一個上午街,
成個人身慶慶地咁唔多妥. 仲標冷汗!
我都唔知咩事, 難得我準備得咁好, 唔通個天都唔鐘意我?
心中慌亂, 於是藥石亂投.
結果成晚共食左兩粒 1000mg 維他命c, 飲左三杯檸檬熱飲.
以及四大支屈臣氏蒸餾水. 夜晚仲著住外套訓.
當晚自然睡得不好, 十點鐘才睡著兩點半醒, 一直就不能合眼.
還好身體情況有好轉, 至少沒有不適感覺. 似乎狂灌水是有效的.
反正睡不著, 三點起床梳洗, 拉拉筋, 然後作最後加碳.
我諗我咁大個仔, 真係未試過只用豉油撈白飯,
結果仍吞下兩碗半, 都幾好味~ 如果有豬油應該風味更佳。
四點鐘到地鐘站, 感覺上沒上年多人.
可能因為上年我參加10k, 而絕大部份10k 參賽者已坐第一班地鐵過海了.
半馬和全馬的人較少, 車站也比較冷清一點.
我罕有地戴上耳筒, 聽著我的"發現號", 作最後自我洗腦.
一年前，在同一月台上, 我自已揹住鮮紅色的10k 挑戰組膠袋去參賽,
第一次跑10k 的我混在一眾半馬全馬好手當中，已經覺得分外不好意思，
而那鮮紅色膠袋卻又特別搶眼得可惡, 好似叫人要份外留意我呢個P牌仔一樣.
果陣時覺得揹住黑色全馬挑戰組既師兄們份外低調而有型.
一年之後既今日，到我揹住黑色膠袋出戰, 覺得份外虛榮.
頗有衣錦還鄉之感，最重要係覺得自己一樣有型~ XD
到達尖沙咀, 一上地面已見不少人在彌敦道來回跑熱身, 即時熱血上湧!
與跑會隊友集合後, 即時換衫熱身.
之前一晚飲太多水既結果就係要去廁所,
人很多廁所太少, 去一次至少要排十分鐘.
回到集合點隊友已四散.
其實我去邊度寄行李又唔知, 幾時上線又唔知.
忽然無晒d 盲公竹, 有d 惶恐.
最終都係將背囊交給沒有參賽的班長代為寄存,
然後獨自上線.
上線前, 班長再三叮嚀千萬唔好過份衝動, 要勒住自已頭半程不能超速.
過去幾個月既操練和長課中, 班長教左我好多, 十分感激~
而佢話我做得到的, 絕大多數都真係我能做到的.
所以, 佢說話我一直非常信任, 牢牢記住了~
六時上線, 六點四十分才起步, 即係要呆等四十分鐘,
本來不算難過, 最慘就係飲水太多又想小解卻又不能離開.
係果一刻, 我非常後悔我用來擋風的是又貴又透明的便利雨衣,
而不是又便宜又全黑的垃圾袋.
如果是密不透光的垃圾袋, 我就可以任意在內, 為所欲為......
正當我係起跑線最前端，好用力將精神集中係控制膀胱既肌肉既時候，
但見成大班精英運動員係我面前既精英起號區處煜煜揚揚跑來跑去拉筋熱身,
仲可以起跑10分鐘前先慢慢上線兼且排得前過你！
係果一刻，我就決定今次一定要跑進 330內, 下年進入精英運動員區。
我一定唔要再忍住尿咁等起跑!!
(待續)
沒有留言:
張貼留言