2013半島獅子會10公里公開賽 - PB 0:38:43
上星期好像跑了很多，星期一練習腳軟，力不從心。
星期二覺得雙腿太倦, 決定著compression tight 返工，果下先知原來酸得緊要。
我覺得壓力褲呢樣野, 由其是係長tight, 都係回復用比起比賽用有效
星期三練習回復狀態，之後就一直沒跑。
因為渣馬臨近, 本來都無打算再參加10k 賽.
但因為今次有贊助. 既然唔駛錢又有得成班人一齊玩,
於是又發揮二仔底精神 -- 死跟~
星期日一早到場, 諗住早d 熱下身拎號碼布.
卻據報獲悉持有號碼布既跑友去左城門河既對岸跑比賽~ XDDD
不過無所謂啦~ 正所謂本來無一物, 我原本就無付出過,
反正我都係當部份長課, 無號碼布都照跑可也.
後來有會友問過主辦單位, 原來可以憑身份証即場補發號碼布,
結果最後我獲補發2231 號參賽~
上星期長課時, 班長有提過今個比賽我可以盡力d 去跑.
不過懶左幾日, 之前又掛住搞號碼布無咩熱身, 加上對虎走第一次著...
總之個人都係懶懶地, 都係一心想無傷跑完就算.
之前一晚係錶度 set 左 race pace 係 43分完成.
不過起跑前, 班長再提我一次要跑快d, 既然係咁, 唯有盡力.
今次比賽參賽者不多, 起步後不用左穿右插搵位, 很好跑.
雖然set 左跑速, 但今次決定唔睇錶. 總之憑感盡力覺跑.
頭1k 時快時慢, 2-3k 穩定下來, 又覺得熱身了. 跑得較順暢.
4.5k 左右開始見有人折返, 多數都係1字頭號碼布的.
一直到折返點前, 在我前面又掛2字頭號碼布的跑手不算多.
開始有點想爭取時間和名次的想法......
5k 折返點之後, 爭勝的心越來越烈, 盡力保持速度,
去到6k 左右, 有一個外藉跑手pacing 跟我差不多,
二人拍住跑了一段, 各不相讓, 很好玩~
直至迎頭見到大Mic 師兄為我拍照, 叫我做好跑姿, 我才跨步超越了他.
最後2k 時, Cedric 師兄從後加速超越上來, 我就像平素練習一樣跟著他跑,
當然亦都好似練習一樣, 佢一加速, 我只能望住佢尾燈, 係追唔到既......
末段好辛苦, 証明早上一個花生忌廉檳應該係唔多夠能量支持一個10k 比賽.
而起跑前既一包375 維他奶, 令我非常渴望快d 衝過終點去廁所......
途中見到潔貞和家豪大叫加油. 唯有咬一咬牙, 唔好丟臉.
最尾1k 堅持既動力, 除左果包375維他奶之外, 仲來自背後追上來既腳步聲.
奮戰左好耐, 最後500m 左右終於被他追過了~
卻不是那位黃衫外藉跑手, 而是一位穿黑衫的年輕人.
印象中他應該是全程除Cedric 師兄之外,唯一一個超越我的人.
最終緊隨 Cedric 之後過終點, 有工作人員迎上來為我貼上一張 9 號的貼紙.
那一刻我知道自己盜壘達陣成功~
時間為 0:38:43, 居然係 40分內!! 比起11月 Asics 10k 時個人最佳既0:45:01,
快了足足六分半鐘!! 非常之不可思議!
不過賽道應該短了約 400m 左右, 如果補回長度, 應該都係走 40分鐘左右.
過終點後, 除了向師兄道賀,
最開心就係見到了中段一齊爭持的外藉跑手, 大家互相祝賀完成~
比賽最開心的就係呢d 萍水相逢又互相欣賞的友誼~ 坦率得叫人愉快.
運動會上台領獎這回事, 應該係中五之後近廿年來都未曾試過.
實在感激教練家豪 Anson 以及Charmsports 既一眾師兄師姐.
特別係事前叫我跑快d 又帶我練長課既班長,
末段成為我追趕目標帶我返終點既 Cedric 師兄,
以及中途幫我影相, 令我加速擺脫外藉跑手既大Mic 師兄~
事後咪咪摩摩, 又頒獎又影相,
除左去廁所, 就係去食碗丁蛋麵賀一賀佢~
什麼再加10k 長課都唔記得了. XD
沒有留言:
張貼留言